काठमाडौं । आज राजवंशी समुदायले काठमाडौंमा काद शिरुवा पर्व मनाएका छन् । उनीहरुले काठमाडौंको खुल्ला मञ्चमा विशेष कार्यक्रमको आयोजना गरी काद शिरुवा मनाएका हुन् ।
कार्यक्रममा उनीहरुले एक अर्कालाई हिलो लगाइदिएका थिए । तराईका झापा, मोरङ, सुनसरी, जिल्लामा शिरुवा पर्व धुमधामका साथ मनाइन्छ । तराईमा बस्ने आदिवासी राजवंशी, थारु, मेचे, उराव, किसान, धिमाल, ताजपुरिया, गनगाई र माझी समुदायले शिरुवा पर्व मनाउने गर्छन् ।
नयाँ वर्षसंगै सुरु हुने पर्वका अवसरमा झापाका राजवंशीले काद शिरुवा खेल्छन् । माटोको हिलो बनाएर आपसमा शिरुवा पर्वको शुभकामना आदानप्रदान गर्दै हिलो छ्यापा–छ्याप गरेर ‘काद शिरुवा’ खेल्ने गरिन्छ । माटोबिना जीवन चल्दैन भन्दै राजवंशी जातिले माटोको सम्मान स्वरुप काद शिरुवा खेल्ने गर्छन् ।
राजवंशी समुदायले शिरुवा पर्वलाई प्रमुख चाडका रुपमा मनाउने गर्छन् । राजवंशी समुदायले माटोलाई नै देवताको रुपमा मानेर पुज्ने भएकाले उनीहरु आफूलाई प्रकृति पूजक मानेर वैशाख १ गते हिलो खेलेर रमाउने गर्छन् ।
